ບໍລິສັດ ປີໂຕຣລ້ຽມເທຣດດິ້ງລາວ ມະຫາຊົນ (PTL) ໄດ້ເຊັນສັນຍາຮ່ວມກັບ ບໍລິສັດຫຼັກຊັບ ເອພີເອັມລາວ ຈຳກັດ (APMLAO) ໃນວັນທີ 01 ພະຈິກ 2013 ເພື່ອກຽມບໍລິສັດເຂົ້າຈົດທະບຽນໃນຕະຫຼາດຫຼັກຊັບລາວ ຕະຫຼອດໄລຍະເວລາໃນການກະກຽມຄວາມພ້ອມນັ້ນທັງສອງຝ່າຍກໍ່ໄດ້ເຮັດວຽກຮ່ວມກັນຢ່າງຕັ້ງໜ້າບໍ່ວ່າຈະເປັນການປຶກສາຫາລືໃຫ້ຄຳແນະນຳ ແລະ ແນວທາງປະຕິບັດຢ່າງຫ້າວຫັນສະເໝີມາໂດຍມີເປົ້າໝາຍດຽວກັນ ກໍ່ຄືການປະສົບຜົນສຳເລັດ ແລະ ສາມາດນຳບໍລິສັດເຂົ້າຈົດທະບຽນໃຫ້ໄດ້ພາຍໃນປີ 2014 ດ້ວຍຄວາມຕັ້ງໃຈໃນການປະຕິບັດງານມາໂດຍຕະຫຼອດນັ້ນເມື່ອວັນທີ 20 ຕຸລາ 2014 ບໍລິສັດ ປີໂຕຣລ້ຽມເທຣດດິ້ງລາວ ມະຫາຊົນ ໄດ້ສໍາເລັດການຍື່ນຄໍາຂໍອະນຸຍາດອອກຈຳໜ່າຍຮຸ້ນສາມັນເພື່ອເພີ່ມທຶນໃຫ້ແກ່ມວນຊົນຄັ້ງທຳອິດໃຫ້ກັບສຳນັກງານ ຄະນະກຳມະການຄຸ້ມຄອງຫຼັກຊັບ (ສຄຄຊ) ແລະ ຍື່ນຄຳຂໍຈົດທະບຽນໃນຕະຫຼາດຫຼັກຊັບໃຫ້ກັບຕະຫຼາດຫຼັກຊັບລາວ ແລະ ໄດ້ຮັບຄຳອະນຸຍາດອອກຈຳໜ່າຍຮຸ້ນສາມັນເພື່ອເພີ່ມທຶນໃຫ້ແກ່ມວນຊົນຄັ້ງທຳອິດ ຈາກ ສຄຄຊ ໃນວັນທີ 26 ພະຈິກ 2014 ໂດຍມີບໍລິສັດ ຫຼັກຊັບລ້ານຊ້າງ ມະຫາຊົນ ເປັນຜູ້ຄໍ້າປະກັນການອອກຈຳໜ່າຍຮຸ້ນສາມັນ. ໃນຄັ້ງນີ້ກໍ່ມີຜົນຕອບຮັບຈາກມວນຊົນເປັນຢ່າງດີເຮັດໃຫ້ການລະດົມທຶນຈຳນວນ 240 ຕື້ກີບ, ຈໍານວນ 60 ລ້ານຮຸ້ນ, ໃນລາຄາ 4,000 ກີບ ເປີດຂາຍພາຍໃນ 3 ວັນກໍ່ສາມາດລະດົມທຶນໄດ້ຈົນຄົບຕາມຈຳນວນ.

ຈາກຄວາມສຳເລັດດັ່ງກ່າວນັ້ນ ບໍລິສັດ ປີໂຕຣລ້ຽມເທຣດດິ້ງລາວ ມະຫາຊົນ ກໍ່ໄດ້ນໍາບໍລິສັດເຂົ້າຈົດທະບຽນໃນ ຕະຫຼາດຫຼັກຊັບລາວ ແລະ ໄດ້ມີການເປີດການແລກປ່ຽນຊື້ຂາຍຮຸ້ນເປັນຄັ້ງທຳອິດ (First Trading Day) ໃນວັນທີ 11 ທັນວາ 2015 ທີ່ຜ່ານມາ.